Francesco Ciusa - La madre dell'ucciso

➽ I documenti di Desula. 1

Sa mamma ’e su mortu

Su dolore su coro t’hat siccadu

E istas sezzida gai in su foghile;

Bessire pius non des a su giannile

Nende a fizu tuo: «E ses torradu?»

Cando custumaiat dae monte

Torrare cun su caddu pandeladu,

Cun su fusile a coddu e imbusciadu,

Sa berritta calada in mesu fronte.

Non piùs! non piùs cussu cunfortu

Provare des, o mamma isventurada,

Tantas dies ses gai iscunfortada;

Senza pappare e cun su fogu mortu,

Priva de onzi isperu e donzi oza,

Piegada coment’e unu giuncu,

T’assimizas a unu ezzu truncu

De ilighe, chi pèrdidu hat sa foza.

E che a tie, o mamma, ateras chentu

Consuntas de piantu sunu mortas;

Cun sas manos in pilos, tottu tortas,

Che olìas chi tòrchidu hat su entu.

continua...