Notte de Natale

Toccana sas campànas de Natale

sa festa disizada in ogni domo;

su mundu che a s’antiga torrat como

càrrigu de isperu in tantu male.

In sos montes, in mares e in portos

lontanos, in sas biddas e zittades

comente de Gesus in sas edades

torrat s’umanidade a sos cunfortos

De sa fide, a s’invitu ’e sa paghe

ca troppu hamus penadu e combattidu

dae cando su sole hat coloridu

de lughe ogni pianu ogni nuraghe.

Deo puru t’invoco o Deus nou

gentile Deu de sos cristianos.

M’imbenugio e in altu alzo sas manos

d’ogni penseri meu est che i s’ou

Virgine, senza mal’intenzione,

cun su coro pienu ’e disizos

santos de bene, pro tottu sos fizos

chi adorant sa tua passione.

A su perdonu ispirami, a s’amore

a su tribagliu santu resistente;

faghemi forte, rendemi potente

pro incher’a dogn’ora su dolore;

E sos impetos d’odiu ch’a bortas

mi passana sas carres che turmentu

cun sa furia manna ’e su entu

chi faghet tremer fentanas e portas.

Passa o Deus ancora in cust’edade

de odiu ricca e povera d’amore,

cantende de sa notte in s’isplendore:

«Paghe a sa zente ’e bona volontade!».

Antioco Casula Montanaru

Gentilmente inviata dall'amico Giancarlo Casula